Ikigo cy’Uburezi mu Rwanda (REB) cyatangaje ko hari abanyeshuri boherezwa kwiga mu mahanga ariko ntibagaruke

0
1080
Gasana Janvier

Ikigo cy’Uburezi mu Rwanda (REB) cyatangaje ko hari abanyeshuri boherezwa kwiga mu mahanga ariko ntibagaruke, cyanagerageza kubakurikirana ngo bamenye aho baherereye kikababura.

REB ivuga ko yohereza abanyeshuri bari hagati ya 100 na 120 buri mwaka, muri bo ugasanga nka 50% aribo bashobora kugaruka iyo barangije kwiga. Byongeye, u Rwanda rukoresha amafaranga abarirwa hagati ya miliyari esheshatu n’umunani ku mwaka ku barihirwa muri za kaminuza zo hanze n’abarimu ba kaminuza bajya kongera ubumenyi.

Umuyobozi Mukuru wa REB, Gasana Janvier, yatangarije IGIHE ko hari abarangije kwiga aho boherejwe bakanga kugaruka, bagerageza no kubahamagara ngo banabishyurire itike y’indege bagaruke mu Rwanda ugasanga bakuyeho itumanaho iryo ari ryo ryose bakoreshaga.

Kuri iki kibazo, REB, yatangaje ko bashyizeho ingamba zo guhangana nacyo zirimo imikoranire idasanzwe na za Ambasade z’u Rwanda ziri mu bihugu baba boherejemo abanyeshuri ndetse no kubakurikirana mu buryo bwihariye.

Yagize ati “Icya mbere ni ugukorana byimbitse na za Ambasade zacu ziba ziduhagarariye mu bihugu byo hanze aho abo banyeshuri bajya kwiga, kuko kugira ngo haboneke n’ayo mashuri abakira izo ambasade ziba zabigizemo uruhare; rero twarabyumvikanye mu nama twagiye tugirana n’abantu baduhagarariye mu bihugu byo hanze, hari n’inama twagiranye n’abashinzwe gucunga umutungo muri za Ambasade.”

Yongeyeho ati “Twandikiye abakozi bazo tubasaba kudukurikiranira abanyeshuri cyane ko twabahaye amabaruwa tubibasaba, gusa turanabashimira ko hari ibyo bamaze kudufasha.”

Kuba u Rwanda rwsihyurira abanyeshuri bamwe barangiza ntibagaruke kiba igihombo gikomeye ku gihugu kuko baba baroherejwe ngo bajye guhaha ubumenyi butari mu Rwanda, ngo nibagaruka bazabukoreshe mu guteza imbere igihugu.

Umuyobozi w’ishami rishinzwe gutanga inguzanyo muri REB, Desire Gacinya, yavuze ko bagihangayikishijwe n’abajya kwiga icyiciro cya mbere n’icya kabiri bya kaminuza kuko abiga icya gatatu bo bakunze gutaha.

Yagize ati “Abakunze kugaruka ni abagiye kwiga icyiciro cya gatatu kuko abenshi baba baragiye bafite akazi, abandi bafite imiryango n’izindi nshingano, abantu bakitugora ni abarangije icyiciro cya mbere n’icya kabiri.”

Avuga ko bakunze guhura n’ibyo bibazo ku banyeshuri boherezwa muri Leta Zunze Ubumwe za Amerika kandi bikaba bitoroha kubakurikirana kuko usanga bahita bajya kure y’aho bari baroherejwe.

(Visited 375 times, 1 visits today)
Loading...

LEAVE A REPLY